inbusiness.kz сайти фотосурати
Ўзбекистон Президенти Шавкат Мирзиёев ёшлар билан учрашувда ишбилармон тадбиркорларни қўллаб-қувватлашга қаратилган қатор янгиликларни маълум қилди. Тегишли ҳужжатлар давлат раҳбари томонидан имзоланган, дея хабар берди унинг матбуот котиби Шерзод Асадов.
Биринчидан, Ёшлар агентлиги ҳузурида Ёшлар тадбиркорлигини ривожлантириш жамғармаси ташкил этилиб, унга 100 миллион доллар маблағ ажратилди.
Энди тадбиркор ёшларга 2,5 миллиард сўмгача имтиёзли кредитлар берилади, ташаббускор ёшларнинг стартап лойиҳаларига 2 миллиард сўмгача инвестиция киритилади.
Иккинчидан, олий ўқув юртлари битирувчиларини ишга жойлаштиришнинг янги тизими ишлаб чиқилди, чунки, Президент таъкидлаганидек, бугунги кунда олий маълумотга эга бўлган 90 мингга яқин киши ўз мутахассислиги бўйича иш топишда қийинчиликларга дуч келмоқда. Ушбу муаммоларни ҳал этиш учун Миллий банкка 100 миллион доллар ажратилди. Молия ташкилоти Олий таълим вазирлиги ва Савдо-саноат палатаси билан биргаликда иқтидорли ёшлар ғояларини реал бизнес лойиҳаларига айлантириш имконини берувчи банк хизматлари пакетларини амалга оширади.
Шунингдек, жойларда битирувчиларни ишга жойлаштириш бўйича комиссиялар ташкил этилади, улар таркибига мансабдор шахслар, банклар ва турли корхоналар раҳбарлари киради.
Учинчидан, Президент қарори билан «Алоқабанк» «Ёшлар банки»га айлантирилди. Унинг мақсади тадбиркорлик ташаббускорларини қўллаб-қувватлашдир. Ушбу мақсадлар учун давлат томонидан 200 миллион доллар ажратилган. Банк ўзини ўзи банд қилган ёшлар лойиҳалари учун 100 миллион сўмгача 7 йил муддатга имтиёзли микроқарз ажратади.
Шунингдек, якка тартибдаги тадбиркор бўлган, камида 20 нафар ёшни ишга олиб, кичик корхона очган ва ўқув маркази ташкил қилган ёш тадбиркорларга 7 йил муддатга 5 миллиард сўмгача имтиёзли кредит берилади.
Ҳудудларда «ёшлар бизнес инкубатори» ташкил қилиниб, ёшлар ғоялари стартапга айлантирилади, 6 ойдан 3 йилгача қўллаб-қувватланади, тайёр бизнес, корхона даражасига олиб чиқилади. «Алоқа венчур» жамғармаси орқали стартапларга 50 мингдан 1 миллион долларгача сармоя киритилиб, маҳсулот ва хизматларни ички ва халқаро бозорларда сотиш, бизнес ҳамкор топиш, қўшимча инвестициялар жалб қилишга кўмаклашилади.
Мирзиёев таъкидлаганидек, ҳукумат ёшлар ўртасидаги ишсизликни бартараф этишга алоҳида эътибор қаратади. Одамларни юқори маошли лавозимларда ишлаш учун касб ва тилларга ўргатиш бўйича дастур қабул қилинган. Ушбу мақсадлар учун 126 триллион сўм (9,7 миллиард доллар) йўналтирилди.
Ойига 3 миллион сўм (230 АҚШ доллари) маош билан ёш ходимларни ишга қабул қилаётган корхона эгаларига 1 фоизлик ижтимоий солиқ шаклида имтиёз берилади. Ушбу тизим уч йил давомида амал қилади.
Президент «Ёшлар дафтарини» янгилаш вақти келганини таъкидлади, бу борада мутасадди раҳбарлар олдига кенг кўламли вазифалар қўйилган.
Ўзагини ёшлар ташкил этаётган креатив иқтисодиётни ривожлантириш масаласи ҳам муҳокама қилинди. Тошкент шаҳрида намунавий «Креатив парк» ташкил этиш, сўнгра бу амалиётни ҳудудларга ёйишга қарор қилинди. Креатив индустрия парки резидентларига 2030 йил якунигача имтиёзли солиқ режими жорий этилади. Парклар негизида креатив соҳа вакилларини ўқитадиган бизнес мактаблари ташкил қилинади.
