akorda.kz сайти фотосурати
Остона Украина атрофидаги вазият бўйича «икки йирик давлат» ўртасида мулоқот бошланганини қўллаб-қувватлайди. Бу ҳақда Қозоғистон президенти Қосим-Жомарт Тўқаев 13 февраль куни «Ишчи касблар шаҳри» фестивалида маълум қилди, деб хабар беради унинг матбуот хизмати.
«Ҳозир Украина ҳақида кўп гапирилмоқда. Биз бошиданоқ урушни тугатиш, дипломатик музокаралар йўли билан келишувга эришиш тарафдори бўлганмиз. Бизнинг позициямиз ҳақиқатга айланмоқда, икки йирик давлат сиёсий мулоқотни бошлади», — деди Тўқаев.
«Бу ижобий тенденция Қозоғистонга ҳам фойда келтиради. Шунинг учун биз бу тенденцияни имкон қадар қўллаб-қувватлаймиз», — деди у.
12 февраль куни Россия президенти Владимир Путин ва АҚШ президенти Дональд Трамп бир ярим соатлик телефон суҳбатида Украина атрофидаги вазиятни тартибга солиш истиқболларини муҳокама қилган. Кремлга кўра, Трамп жанговар ҳаракатларни тезда тўхтатиш ва муаммони тинч йўл билан ҳал этиш тарафдори эканини айтган. Бироқ, Путин можаронинг асл сабабларини бартараф этиш зарурлигини таъкидлаган ва Америка раҳбари билан тинчлик музокаралари орқали узоқ муддатли келишувга эришиш мумкин, деган тўхтамга келган, деб таъкидлади Россия президенти матбуот хизмати.
Кейинроқ Трамп Оқ уйда бўлиб ўтган матбуот анжуманида Украинанинг НАТОга қўшилиш ғоясини «қулай эмас» деб атади. У, шунингдек, мамлакатнинг 2014 йилги чегараларига қайтиши «эҳтимолдан узоқ» эканини таъкидлади, шунингдек Киев келажакда ўз ҳудудларининг бир қисмини қайтариб олиши мумкинлигини истисно қилмади.
Тўқаев илгари бир неча бор Россия ва Украина ўртасидаги можаро бўйича сиёсий мулоқотлар бошлашга чақирган. Январь ойи бошида «Ана тілі» газетасига берган интервьюсида у Россияни жанг майдонида мағлуб этиб бўлмайди, деган позициясини яна бир бор эслатди. Тўқаев, шунингдек, бу масалани Трамп билан 2024 йилги АҚШ сайловларидан кейин бўлиб ўтган телефон суҳбатида муҳокама қилганини эслатди. Ўшанда Қозоғистон раҳбари бу ўта мураккаб муаммонинг ечими «низолашаётган давлатлар раҳбарларининг ва, албатта, жаҳоннинг қудратли давлати етакчиси бўлмиш Трампнинг иродаси ва хоҳишига» боғлиқлигини таъкидлаган.
