freepik.com сайти фотосурати
Қозоғистонда норезидентлар учун тўлов карталарининг амал қилиш муддатига 12 ойлик чеклов белгиланди. Бундай қарор Молия бозорини тартибга солиш ва ривожлантириш агентлиги томонидан қабул қилинди. Агентлик қарори 2024 йил 31 декабрда қабул қилинган ва эълон қилинган.
«Қозоғистон Республикаси норезидентлари бўлган мижозларга берилган тўлов карталарининг амал қилиш муддати 12 календар ойдан ошмайди, тадбиркорлик субъектлари, дипломатик ходимлар ва инвесторларга берилган тўлов карталари бундан мустасно», — дейилади ҳужжатда.
«Курсив» нашрининг аниқлик киритувчи саволига жавобан агентлик янги қоидалар амалдаги тўлов карталарига тааллуқли эмаслигини тушунтирди.
Шу тариқа, Агентлик жиноий даромадларни легаллаштириш, гиёҳванд моддаларнинг ноқонуний айланиши ва рақамли активлар соҳасида банк хизматларидан фойдаланиш хавфини минималлаштиришни мақсад қилган.
Янги қоидаларга кўра, банк учун битта банкнинг 5 дан ортиқ карталари эгалари (илгари, «Интерфакс» эслатишича, 10 та карта ҳақида гап борган) ва ҳар бирида 3 ёки ундан ортиқ карта очиқ бўлган уч ёки ундан ортиқ кредит ташкилотлари мижозлари пул ювиш ва террорчиликни молиялаштириш бўйича гумондор ҳисобланади. Бундай мижозлар қўшимча текширувларга дуч келишади. Болалар номига чиқарилган қўшимча тўлов карталари, шунингдек, банк кредитларини бериш ва тўлаш учун кредит карталари бундан мустасно.
Шунингдек, банклар норезидентнинг Қозоғистонда бўлиши қонунийлигини тасдиқловчи ҳужжатларни — меҳнат шартномаси, ўқув шартномаси, яшаш рухсатномаси ва бошқаларни текширишлари керак бўлади. ЕОИИ мамлакатлари фуқаролари учун истисно қилинган.
Январь ойи бошида Қозоғистон Молиявий мониторинг агентлиги 2024 йили тахминан 6200 дона дроп-карталар (сохта шахсларга берилган банк карталари) орқали 24 миллиард тенге (45 миллион доллар) қийматидаги пул ювиш ҳолатлари аниқлангани ҳақида хабар берганди. Дроп-карталари кўпинча гиёҳванд моддалар савдоси, киберфирибгарлик, ноқонуний қимор ўйинлари ва бошқа жиноятлар билан боғлиқ схемаларда ишлатилган.
«Бундай карталар эгаларининг 90% дан ортиғи норезидентлар бўлган», — дея таъкидлайди агентлик.
Улар ҳақидаги маълумотлар хорижий давлатлар ҳуқуқ-тартибот идораларига юборилган.
