Дмитрий Бивол. Боксчининг ижтимоий тармоқдаги фотосурати
Қирғизистон президенти Садир Жапаров россиялик боксчи Дмитрий Биволга Rolls-Royce Silver Shadow коллекцион автомобилини совға қилди. Бу ҳақда боксчи Instagram (РФда экстремистик деб тан олинган ва тақиқланган Meta корпорациясига тегишли тармоқ) да маълум қилди.
«Фантастик совға», — деб ёзган Бивол ўз постида ва Қирғизистон президенти номи ёзилган тэгни қўшган.
Алоҳида, Storiesда Дмитрий Бивол Бишкекда президентнинг ўғли Рустам Жапаров унга машина калитини топшираётганини кўрсатган.
«Чемпион биродаримизга Садир Нурғозоевичдан чин юракдан», – дейди Рустам ва Дмитрийга Rolls-Royce калитини топширган.
Carcheck маълумотларига кўра, совға қилинган машина 1977 йил модели ҳисобланади. У Қирғизистонда 2022 йил май ойида рўйхатга олинган, тахминий нархи 150 минг долларни ташкил қилади.
Бивол Қирғизистоннинг Тўқмоқ шаҳрида туғилган ва шу ерда боксдаги илк қадамларини қўйган. Кейин у Россияга кўчиб ўтган ва шу мамлакат байроғи остида курашган. 2022 йил августида Дмитрий Бивол мексикалик Саул Алваресга қарши жангда Қирғизистон байроғи остида илк бор рингга чиққан.
«Ҳеч кимни хафа қилмоқчи эмасман, лекин, тўғрисини айтсам, Қирғизистон байроғи остида мусобақаларда қатнашиш хаёлимга ҳам келмаганди. Мен профессионал боксчи бўлганимда ҳеч қачон бу байроқ остига рингга тушмаганман. Мен терма жамоа аъзоси бўлганим ва терма жамоани қўллаб-қувватлаганим учун Россия байроғи остида мусобақаларда қатнашганман. Улар жангни бекор қилмоқчи бўлишди, чунки вазият шундай (Россия ҳукуматининг Украина ҳудудида МҲО ўтказаётгани назарда тутилади. – «Фарғона» изоҳи) эди. Байроқ, мадҳия билан чиқолмайсан, мен рингга чиқадиган Виктор Цой мусиқасидан фойдалана олмайсан, дейишди. Шунга кўра, ташкилотчиларнинг ўзлари шундай қарор қилишган. Кейинроқ билдимки, орқада экран бор экан. Буни билмагандим, фақат жангдан кейин кўрдим. Ва мен мамнун бўлдим. Улар Қирғизистонда туғилганимни қайд этишган. Шундай бўлганди», — деган Бивол жангдан сўнг.
Сўнгги мусобақаларда Бивол яна Россия байроғи остида жанг қилган.
Дмитрий Бивол — WBA-Super (2019-2024) ва IBO (2023-2024) бўйича собиқ жаҳон чемпиони; WBA версияси бўйича собиқ мунтазам чемпион.
