11 январь куни Афғонистон пойтахти Кобулда Ташқи ишлар вазирлиги биноси яқинида худкуш-террорчи ўзини портлатиб юборган ва 21 киши ҳалок бўлган. Бу ҳақда «РИА Новости» ўз манбасига таяниб хабар берди.
Қурбонларнинг аксарияти 2021 йил августида Афғонистонда ҳокимиятни эгаллаб олган «Толибон»* радикал ҳаракати томонидан тузилган ҳукуматнинг Ташқи ишлар вазирлиги ёки Маданият ва ахборот вазирлиги ходимлари экани айтилади.
«Ал-Жазира» телеканалининг аниқлик киритишича, худкуш-террорчи ТИВ мажмуаси периметри ичига киришга уринган, бироқ хавфсизлик ходимлари томонидан тўхтатилган ва у ўзини бинога кириш олдида портлатиб юборган. Ўша пайтда Ташқи ишлар вазирлигининг бош биносида хитойлик дипломатлар ва толиблар ҳукумати вакиллари иштирокида музокаралар олиб борилаётган бўлган.
Эслатиб ўтамиз, ўтган йил 5 сентябрь куни Россиянинг Кобулдаги элчихонаси консуллик бўлимига кириш жойи яқинида «Ироқ ва Шом ислом давлати» * (ИШИД) террорчилик гуруҳининг худкуш-террорчиси ўзини портлатиб юборган эди.
У консуллик ходими визага номзодларни эълон қилиш учун навбатда турган одамлар олдига чиққан пайтда портловчи қурилмани ишга туширган. Бошқа версияга кўра, Россия элчихонасининг ташқи периметрини қўриқлаётган радикал «Толибон» жангарилари худкуш-террорчини отиб ташлашга муваффақ бўлган, аммо отишмалар чоғида террорчи қўйган портловчи моддалар портлаб кетган.
Натижада Россия элчихонасининг икки ходими ҳалок бўлган: иккинчи котиб Михаил Шах ва мутахассис эксперт (хавфсизлик ходими) Адигжи Кужугет. Булардан ташқари, элчихонанинг ташқи атрофини қўриқлаётган икки «Толибон» жангариси ва навбатда турган камида олти нафар тинч афғон қурбон бўлган.
*Юлдузча билан белгиланган ташкилотлар Россия ва кўпгина давлатларда террорчи сифатида тан олинган ва тақиқланган (Россия қонунчилиги талаби бўйича изоҳлаб ўтамиз).
