Сердар Бердимуҳамедов ва Жанни Инфантино. turkmenportal.com сайти фотосурати
Туркманистон президенти Сердар Бердимуҳамедов Қатар Амири Тамим бин Ҳамад Ол Соний таклифига биноан Доҳага ташриф буюрди. Ташриф давомида у жаҳон чемпионатининг 1/8 финалидан ўрин олган Голландия – АҚШ ўйинига ташриф буюриб, ФИФА президенти Жанни Инфантино билан учрашди. Бу ҳақда «Туркменистан сегодня» нашри хабар берди.
«Хроника Туркменистана» нашрининг аниқлик киритишича, Бердимуҳамедовнинг Доҳага ташрифи шу йилнинг август ойи охиридан бери муҳокама қилинаётганди. Парвоз олдидан Туркманистон президенти Қатарнинг Ашхободдаги элчиси Ғанем бин Абдуллоҳ Ал Ройхи билан суҳбатлашган.
Бердимуҳамедов 3 декабрь куни Доҳага келган ва Қатар пойтахтида икки давлат раҳбарларининг учрашуви бўлиб ўтган. Музокаралар давомида айнан нима муҳокама қилингани ҳақида хабар берилмаган.
Расмий тадбирлар якунида Бердимуҳамедов Голландия ва АҚШ терма жамоалари ўртасидаги ўйинга фахрий меҳмон сифатида «Халифа» стадионига таклиф қилинган. Ўйин голландиялик футболчилар фойдасига 3:1 ҳисобида якунланди. Сердар Бердимуҳамедов қайси жамоа ёнини олганига аниқлик киритилмаган.
Бердимуҳамедов стадионнинг VIP-ложасида ФИФА президенти билан учрашиб, суҳбатлашган. Жанни Инфантино «Бердимуҳамедовнинг Қатарга ташрифи спорт, хусусан, футбол соҳасидаги халқаро алоқаларни ривожлантириш учун муҳимлигини» таъкидлаб, «Туркманистонда спорт ва олимпия ҳаракати кенг ривожланаётганини» қайд этган.
Футбол бўйича жаҳон чемпионати 20 ноябрдан 18 декабргача Қатарда бўлиб ўтади. Турнирда 32 та жамоа иштирок этмоқди. Франция амалдаги жаҳон чемпиони ҳисобланади.
Туркманистон терма жамоаси ҳеч қачон жаҳон чемпионатларининг финал босқичига чиқа олмаган ва бор-йўғи икки марта Осиё Кубогида қатнашган ва бирорта ҳам ғалаба қозона олмаган. Қолаверса, Туркманистон терма жамоаси 2023 йили Қатарда бўлиб ўтадиган Осиё Кубогига йўлланмани қўлга кирита олмаган ягона Марказий Осиё терма жамоаси ҳисобланади.
