Самарқанд вилоят ИИБ бошлиғи иштирокида ўтказилган матбуот анжуманида 2 нафар ходим ички ишлар тизимидан ишдан бўшатилган ва уларга нисбатан прокуратура органлари томонидан жиноят иши қўзғатилгани ҳақида маълумот берилди, деб хабар беради ЎзА.
Воқеа 21 майга ўтар кечаси содир бўлган. Самарқанд ИИБ патрул хизмати ходимлари томонидан Қозоғистондан келган бир неча сайёҳ тўхтатилган. Меҳмонлар ҳужжатларини кўрсатганига қарамай, орган ходимлари уларни электр шокер ёрдамида милиция бўлимига боришга мажбур қилишган.
Жабрланганлардан бирининг сўзларига кўра, милиция бўлимида сайёҳлардан шахсий буюмлар ва ҳужжатлар олиб қўйилган. Офицер ўзини юқори мартабалиман деб таништириб, уларни ҳибсга олиш вақтида ёзиб олган барча видеоларни ўчириб ташлашга ва «бу ишни кўпиртирмасликка» кўндирган. Сайёҳлар икки соатдан кейин қўйиб юборилган.
Кейинроқ Ўзбекистон ИИВ мазкур орган ходимлари касб этикаси меъёрларини қўпол равишда бузгани ва ўз ваколатлари доирасидан четга чиққанини маълум қилди
Қозоғистон Ташқи ишлар вазирлиги воқеага муносабат билдириб, Ўзбекистон расмийларидан вазиятни ўрганишни сўраган.
