Маданий мерос агентлиги матбуот хизмати фотосурати
Хива шаҳрида жойлашган «Ичан-қалъа» музей-қўриқхонаси экспонатлари орасидан сохта нарсалар топилди. Бу ҳақда Ўзбекистон Маданий мерос агентлиги матбуот хизмати хабар берди.
Ноёб ашёлар рўйхатига киритилган экспонатларни ўрганар экан, агентлик ва ҳукумат ҳузуридаги Маданий меросни муҳофаза қилиш инспекцияси ходимлари томонидан
101 та музей ашёлари кирим китоби тавсифномаларига ўлчами, материали, ишланиш услуби ва яратилган даври бўйича мос келмаслиги аниқланган.
Хусусан, айрим ашёларнинг тавсифларига ўзгартиришлар киритилганлиги юзасидан асословчи ҳужжатлар мавжуд эмас, деб топилди. Музей-қўриқхонанинг масъул ходимлари 1994 йилгача музей фондига ўтказилган ашёларни қабул қилиш далолатномаларининг бир қисмини инспекторларга тақдим эта олмаганлар.
Ичанқалъадаги ҳолатни ўрганиш жараёнида тўпланган материаллар ҳуқуқий баҳо бериш учун Бош прокуратурага тақдим этилган.
Ичан-қалъа мажмуаси Марказий Осиёда сақланиб қолган ягона шаҳар-ёдгорликдир. У 1598 йил қурила бошланган деб ҳисобланади. Мажмуа катта девор билан ўралган, тахминан бир квадрат километрга тенг майдонни эгаллайди. Бу ерда 120 дан ортиқ меъморий ёдгорликлар мавжуд.
Музей 1920 йил апрель ойида ташкил этилган бўлиб, фондининг асосини хон девонхонаси ҳужжатлари ва хон саройининг ашёлари ташкил этган. Бугунги кунда у 26 гектар майдонни эгаллайди. Музей кспозицияларида Хоразмнинг ибтидоий жамоа тузумидан то ҳозирги кунгача бўлган тарихи акс эттирилган.
Музей фондида 55 мингга яқин экспонат мавжуд. Темурғози Тўранинг милтиғи, Муҳаммад Раҳимхон II нинг бахмал чопони, Хоразмшоҳларнинг олтин тангаси, ўсимлик нақшлари туширилган ўйилган эшик, Огахийнинг араб тилидаги мисралари, Хива хонлиги қозилари (қозилари) муҳрлари коллекцияси, заргарлик буюмлари коллекцияси ва бошқалар музейдан ўрин олган.
