«Ўзбекистон темир йўллари» матбуот хизмати фотосурати
2 майдан Олмаота ва Тошкент ўртасида Талго-Тулпар йўловчи поезди қатнай бошлайди. Бу ҳақда «Ўзбекистон темир йўллари» акциядорлик жамияти матбуот хизмати хабар берди.
1/2-сонли мунтазам тезюрар поезд ҳафтасига уч марта Олмаота-2 – Тошкент – Олмаота-2 йўналиши бўйлаб ҳаракатланади. Поезд «Тошкент-Марказий» вокзалидан Қозоғистонга сешанба, пайшанба ва якшанба кунлари жўнайди. «Олмаота-2» станциясидан Ўзбекистонга — душанба, чоршанба ва шанба кунлари.
Бундан олдин, 1 апрелдан бошлаб 647/648-сонли йўловчи поезди Нукус-Бейнеу-Нукус йўналишида ҳаракатлана бошлагани хабар қилинганди. Қорақалпоғистон пойтахти вокзалидан сешанба, жума ва якшанба кунлари поезд жўнайди. Бейнеу станциясидан (Қозоғистоннинг Мангистау вилояти) — душанба, чоршанба ва шанба кунлари.
Ўзбекистон ва Қозоғистон ўртасида 2020 йил март ойида коронавирус карантини чекловлари доирасида ер усти қатнови тўхтатилган эди. 2021 йил май ойида Ўзбекистон йўловчи темир йўл қатновини тиклашни таклиф қилди.
Жорий йилнинг 16 мартидан бошлаб мамлакатлар ўртасида автобуслар мунтазам қатнай бошлади. Уларда Тошкентдан Нурсултон, Олмаота, Қизилўрда, Туркистон ва Иргелига бориш мумкин. Чирчиқдан Чимкент ва Олмаотага иккита рейс йўловчиларни олиб боради.
2021 йил октябрь ойида Ўзбекистон ва Тожикистон ўртасида пандемия сабабли узилиб қолган автобус қатнови тикланди – Тошкентдан Хўжандга қатнов йўлга қўйилди.
