Ўзбекистон президенти матбуот хизмати фотосурати
Ўзбекистон Президенти Шавкат Мирзиёев ҳукуматга буғдой, ўсимлик ёғи, шакар ва бошқа озиқ-овқат маҳсулотларини импорт қилувчи тадбиркорларга ёрдам кўрсатиш бўйича топшириқ берди.
Вазирлар Маҳкамасининг асосий вазифалари ички бозорда нархлар барқарорлигини таъминлаш, инфляция даражасини пасайтириш ва унинг даражасини тезроқ мақсадли кўрсаткичга қайтариш орқали аҳоли эҳтиёжларини қондиришдан иборат, деб хабар беради Ўзбекистон президенти матбуот хизмати.
«Коронавирус пандемияси пайтида ҳамма соҳаларни оғир шароитдан олиб чиқиш бўйича қарорлар қабул қилганимиз ўз натижасини берди. Ҳозирги вазиятда ҳам хавф-хатарларни олдиндан кўра билишимиз керак. Дунёда бўлаётган воқеалар натижаларга салбий таъсир кўрсатмаслиги учун аниқ чора-тадбирларни белгилаб олишимиз зарур. Айниқса, тадбиркорларга енгиллик яратиб, ҳар томонлама қўллаб-қувватлашимиз керак», — деди Мирзиёев 23 март куни бўлиб ўтган иқтисодий барқарорликни таъминлаш чора-тадбирларига бағишланган йиғилишда.
Озиқ-овқат маҳсулотлари нархининг ошишига йўл қўймаслик бўйича амалга оширилиши режалаштирилган чора-тадбирлар қаторида бир қатор озиқ-овқат маҳсулотларига божхона тўловларини нолга тушириш имконияти кўриб чиқилмоқда. Бу ҳақда Бош вазир ўринбосари, Иқтисодий ривожланиш ва камбағалликни қисқартириш вазири Жамшид Қўчқоров йиғилишдан сўнг маълум қилди.
Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлигига тадбиркорлар билан кунлик мулоқот ўрнатиб, уларнинг лойиҳалари, ишлаб чиқариш фаолияти, экспорт-импорт амалиётларига кўмаклашиш бўйича топшириқлар берилди. Президент экспортчи корхоналарнинг транспорт-логистика масалаларини ҳал қилиб бориш, уларнинг транспорт харажатларини қисман қоплаш амалиётини кенгайтириш бўйича кўрсатма берди.
Валюта бозоридаги ноаниқ вазиятни инобатга олган ҳолда, Марказий банкка ички валюта бозори барқарорлигини ва валюта курсининг мослашувчанлигини таъминлашда эҳтиёткорона ёндашувни қўллаш топширилди. Мирзиёев ички валюта бозоридаги вазиятни ҳар куни кузатиб бориш муҳимлигини таъкидлаб, фуқароларни мавжуд вазият, кутилаётган ўзгаришлар ва кўрилаётган чора-тадбирлар тўғрисида хабардор қилишни топширди.
«Транспорт-логистика масалаларини ҳал этиш, жумладан, «Ўзбекистон ҳаво йўллари» фаолиятини такомиллаштириш бўйича кўрсатмалар берилди. Шу билан бирга, солиқ қўмитасига тадбиркорларни, айниқса кичик ва ўрта бизнес вакилларини ҳар томонлама қўллаб-қувватлаш бўйича топшириқ берилди», — деди Қўчқоров.
Жумладан, тадбиркорлар зиммасидаги солиқ юкини камайтириш, чет эл валютасида олинган кредитларни ўзбек сўмида қайтариш имкониятини яратиш зарурлиги ҳақида сўз юритилди.
Меҳнат мигрантлари муаммоларини ҳал қилиш учун Иқтисодий ривожланиш вазирлиги, Молия вазирлиги, Марказий банк, Инвестициялар ва ташқи савдо вазирликлари вакилларидан иборат махсус штаб ташкил этилади.
